زي اللغز

ما كنتيش حبيبتي بس سبتي فيا أثر الحبيبة

اللي ما لحقتهاش ولا كان ينفع ألحقها

كنتي حلم واقف بعيد، أقربله خطوة، يرجع خطوتين

مش عشان أنا جبان عشان انتي صعبة … و صعبك كان حلو زيادة عن اللزوم

جميلة؟

أكتر من إن الجمال يتشاف، جمالك كان محتاج صبر

 محتاج حد يستحمل الوجع قبل ما يوصل للنور

صغيرة في السن، بس كبيرة في الدرس 

علمتيني إن في ناس تيجي متأخر قوي

علشان تعلمك بدري قوي، إن مش كل اللي القلب يحبه، ينفع القلب يملكه

شخصيتك معقدة زي لغز بيتحل مرة واحدة في العمر

واللي يفكر يفهمك من بعيد، يضيع, واللي يقرب زيادة، يتجرح

غير اللي يقرب بقلبه، ويستحمل يشوف فيكي اجمل ما في الخيال

انتي مش سهلة، ولا عمرك هتكوني

انتي حد ما يشوفش حلاوته، غير اللي اتلسع من قسوته

اللي استحمل بردك، وحرّك، وسكاتك

أنا واحد من اللي قربوا وما وصلوش

شافوا النور بس اتحرموا منه

اتعلموا منك بس ما خدوكيش

أكتر حاجة وجعتني مش إنك ما كنتيش ليا

اللي وجعني، إني حسّيت إنك كنتي ممكن تكوني ليا

بس الدنيا قالت: لأ

ومن ساعتها وأنا كل ما أفتكرك

أبتسم وجع، وأعيّط هدوء

وأقول:

في ناس خسارتها، إنها ما كانتش خسارة

ولا كانت مكسب، كانت درس … كلفني قلبي كله

-رامز الكسان